सन् १९७३ को अप्रिल ३ अर्थात् आज भन्दा ५० वर्ष अगाडि आजकै दिन पहिलो मोबाइल कल गरिएको थियो । मोटोरोलाका इन्जिनियर मार्टी कुपरले आफ्नो गोजीबाट फोनबुक झिकेर एउटा ठूलो डिभाइसमा नम्बर डाइल गरे । अनि त्यो डिभाइसलाई आफ्नो कानतिर लगेर राखे । त्यतिबेला सबैजनाको आखाँ उनीतिर नै थियो । 

उनले सो डिभाइसबाट आफ्नै सहकर्मीलाई फोन लगाए । यसरी आफ्नै खल्तीमा अटाउन सकिने सेलफोनबाट उनले पहिलो कल गरे ।

जहाँ मानिसहरू एक शताब्दी लामो समयसम्म फोनको तारमा बाँधिएर बसेका थिए त्यहाँ कुपरले मानिसलाई स्वतन्त्र बनाउन यो डिभाइस तयार गरे ।

वास्तवमा तत्कालिन समयमा बेल ल्याबोरेटरी घर वा अफिसमा मात्र फोनमा कुरा गर्न सकिने अवस्थालाई अन्त्य गर्दै कारमा पनि प्रयोग गर्न सकिने फोन बनाउने तयारीमा थिए । 

तर कुपरको लागि यो मान्य थिएन । "हामी सय वर्षसम्म आफ्नो घर वा अफिसमा यही तामाको तारमा अल्झिएर बस्यौँ । अब कम्पनी हामीलाई कारमा पनि त्यही तारमा बाँधेर राख्न चाहन्थ्यो । यो सोच नै मलाई मन परेन," बीबीसीसँगको कुराकानीमा कुपरले बताए ।

मोटोरोला र कुपर दुवैले यो कुरालाई नकार्दै नयाँ डिभाइसमा काम गर्न थाले । फलस्वरुप आज सबैको हात-हातमा मोबाइल छ । त्यो पहिलो मोबाइल कल जसरी प्रयोग भएको थियो आज पनि प्रक्रिया उही नै छ । 
फोनले तपाईँको आवाजलाई विद्युतीय संकेतमा परिणत गर्छ र रेडियो वेभमा परिमार्जन हुन्छ । 

उक्त रेडियो वेब नेटवर्कका टावरबाट प्रशारण हुन्छन् र सो टावरले तपाईँको आवाज तपाईँले फोन गर्नु भएको अर्को व्यक्तिसम्म पुराउन मद्दत गर्दछ ।

मोटोरोलाको त्यो पहिलो मोबाइलको तुलनामा आजका स्मार्टफोनहरू निकै विकसित छन् । कम्पनीलाई त उक्त पहिलो मोबाइल फोनको व्यावसायिक मोडेल बजारमा प्रयोगकर्ताको लागि उपलब्ध गराउन नै ११ वर्ष लागेको थियो ।

कुपरले आफ्नो प्रोटोटाइप फोनबाट कल गरेको ११ वर्षपछि १९८४ मा मात्र उक्त फोन सार्वजनिक भएको थियो । त्यो समयमा उक्त फोनको मूल्य ११ हजार ७०० डलर थियो । 

त्यो समयमा त्यो फोनबाट कुनै मेसेज गर्न वा फोटो खिच्न मिल्दैन थियो । यो फोन कल मात्र गर्नका लागि तयार गरिएको थियो । यसमा एकपटकमा ३० मिनेटसम्म मात्र बोल्न सकिन्थ्यो भने यो फोनको चार्ज १० घण्टासम्म टिक्थ्यो ।